Dolina při rěce

Dolina při rěce je moja prěnja mjezynarodna serija za dźěći, cyłkownje w 9 rěčach. Hornjoserbsce předleži wona jako dwurěčna serbsko-němska a jako serbsko-jendźelska kniha. Najzbožowniša sym, zo móžu ju jako słuchoknihu, dwurěčnu ćišćanu wersiju a jako dwurěčny e-book poskićeć. Za serbske dźěći, ale tež za serbsce wuknjacych. Daj so rady zakuzłać 🙂

Moje dźěćace knihi

Dolina při rěce – Lute překwapjenki

Dolina při rěce – Lute překwapjenki

W druhej knize Doliny při rěce dožiwja mali přećeljo dalše dyrdomdeje a wjesela so, je z wami dźělić móc. Tež tuta kniha předleži serbsko-němsce a serbsko-jendźelsce, k tomu poskićujemoj digitalnje serbsku słuchoknihu, kotruž čita Gabriela Maria Šmajdźina.

Dolina při rěce - Mali přećeljo

Dolina při rěce – Mali přećeljo

Moja prěnja mjezynarodna kniha w cyłkownje 9 rěčach, hornjoserbsce z dwurěčnej ćišćanej wersiju, słuchoknihu a e-bookom. Stajnje serbsko-němsce a serbsko-jendźelsce. Na to sym jara horda.

Kriminalka Lubina Hajduk-Veljkovićowa

Módre buny

To je prawy krimi za dorosćenych. Wón jedna w sportowym miljeju, wjace pak tu njepřeradźu. Rady pisam tež serbske powědančka abo romany za dorosćenych.

Što je na mojich dźěćacych knihach tak rjane?

Hdyž wuwiwam nowu dźěćacu knihu, dam figuram čas, w mojej hłowje rosć a wožiwjeć. Wone maja potom swójski indiwiduelny charakter kaž my ludźo tež a reaguja rozdźělnje na wěste situacije. Nimo toho čuju so z dźěćacym swětom jara zwjazana a jemu bliska, móžu swět na zbožo přeco hišće z wočomaj dźěsća widźeć a to mje samu tež stajnje znowa překwapja.

Impresije mojich dźěćacych knihow

Serbska dźěćaca kniha - Juliana
Serbska dźěćaca kniha - Lubina Hajduk-Veljkovićowa
Zeserbšćeny film
Konjaca kniha - Lubina Hajduk-Veljkovićowa
Branko a Lubina zhromadnje čitataj
Dolina při rěce - Nowa dźěćaca kniha
Wosebite wokomiki w Lubininym žiwjenju

Što fascinuje mje na zwěrjećich stawiznach?

Na zwěrjećich stawiznach mje fascinuje, zo su wone hišće kročel dale zdalene wot našeho „praweho” žiwjenja. Dawam swojim zwěrjećim figuram wjele čłowjeskich kajkosćow, tola wone namakaja hustodosć swójske kreatiwne rozrisanja za prašenja a wužadanja. Tak kaž tež dźěći přichoda přeco nowe, swójske rozrisanja namakaja, zo by so swět dale wuwiwał.

Zwěrjeću stupimy jako čitarjo z dowěru a sympatiju napřećo, přez čož akceptujemy lóšo šěrokosć móžnosćow wšelakich charakternych kajkosćow. Zwěrjata móža dźěćom pomhać, to, štož su dožiwili, přirunować a pomjenować. Wosebje za małe dźěći je lóšo, so z nimi identifikować. Tu dźe wo zasadne temy kaž přećelstwo abo wěste strachi, kiž so we wobłuku zwěrjećeho swěta předstaja. Dźěći trjebaja přeco zaso nowe stawizny, w kotrychž so temy, kiž je zaběraja, wariěruja.

Tohodla mje wjeseli, zo wotnětka tež wćipnej myšce Měrka a Kiki kaž tež zajac Ferdi k tomu słušeja. Zajimawe je, zo je ilustrator charakteristiku zwěrjatow intuitiwnje jasnje zrozumił a zwobraznił, hačrunjež je w hinašej kulturje žiwy. To je mi hišće raz wujasniło, zo stawizny a tež figury z Doliny při rěce mjezynarodnje skutkuja. Tohodla je derje, zo wone nětko we wjele rěčach wuchadźeja – sym wćipna na feedback.

– Lubina Hajduk-Veljkovićowa

Wjeselu so na twoju powěsć!

Měj dźak, zo sy na tutej internetnej stronje! To je woprawdźe wulkotnje. Hdyž chceš, słuchaj na naju podcast, sćěhuj naju w socialnych medijach abo napisaj namaj powěsć. Wotmołwimoj na kóždu powěsć!

Zaćišće z naju žiwjenja: